Mar 14 | YML | STEP | 'Aiata 'ailuga i na 'a'ava, mulieta Uvi'agalatagona 'ana sakali i na 'idewai. Sakalinina 'waineye me Diu beledi kebu 'ana 'ivebwaika i 'ani'ani, 'adi 'eba tolinuata'i basenadiotoga Yaubada tubudiavo i 'ita'ita'iedi 'awalawa Itifita 'wainega. Tutuyanina 'waineye me Diu yadi tovelomu 'adi to'edakumetavo wata ve'etoboda 'adi tovevo i veifufu bani'odi i na munega givagivayega Iesu i na 'ive'avini i na luvewafai.

Mark 14

I luala Iesu 'ana laugiva faifaina.

1 'Aiata 'ailuga i na 'a'ava, mulieta Uvi'agalatagona 'ana sakali i na 'idewai. Sakalinina 'waineye me Diu beledi kebu 'ana 'ivebwaika i 'ani'ani, 'adi 'eba tolinuata'i basenadiotoga Yaubada tubudiavo i 'ita'ita'iedi 'awalawa Itifita 'wainega. Tutuyanina 'waineye me Diu yadi tovelomu 'adi to'edakumetavo wata ve'etoboda 'adi tovevo i veifufu bani'odi i na munega givagivayega Iesu i na 'ive'avini i na luvewafai. 2 Siwe wata i vo, Kebu sakalie ta na 'ive'aviniga i na nunago egavo nuanuadi Iesu, i na nuasako i na daba.”

S1 Sou 12:1-27 Mak 10:33-34

Iesu 'ana iwaga.

3 Iesu bola i miamia 'atamana Bedani, Saimoni yana vanuge, taunina basenadi waiwaiseselina. I 'ani'ani nika tamu vavine bunama i mieni, magaina 'atumaina wata 'ana tutula bwaikina. Bunamanina 'ana wagava Nadi, we'e bei i koiaga kileu i 'idewai 'ana 'isa 'atumaiotogina, 'ana wagava alibasita. Bega bunamanina 'odona i tutubaia Iesu nava'auna i iwagi.

4 Tomotoga 'ifwaidi i 'iseni, ma yadi nuasako i luvulewa i vo, Awale bunama i ve'amubwadodoyeni? 5 I lubwaineni i da vekimwaneyeni bega mani bwaikina i da veluagai bani'odi lubulubu 300, ^{▼▼'Ana mogitana me Diu yadi mani Denali 300, bani'odi malamala 'aitamogana 'ana folova tutulina.} 'wainega wekowekoma i da 'ivaisedi.” Faifainanina vavine i yagaia.

6 Iesu i vonedi i vo, 'Asa'aiana, 'wa 'ailove, vavine kebu 'wa na 'ivebunumayagi. Naninina i 'idewaiga 'waikuye 'atumaiotogina i lubwaineni, we'e wekowekoma tutuya fuedi taiadi 'wa na miamiani, tutuyanina nuanuami 'ami fata 'wa na 'ivaisedi. We'e yau kebu tutuya manamanawena taiadi ta na miamia. 8 Vavine de'e yana 'aivaita 'waikuye bwaikina siwe kebu wata tamu ava'ai bega i na 'idewai 'waikuye. Bunama i iwagi tomogoku i 'idewa-vagaseni 'aku ve'ufa faifaina me Diu yada sauluva bani'odi. 9 A vona mogitana, bola Valaku 'Atumaina i na lulu'ageyeni fwayafwaya matatabuna 'waineye vavine de'e yana folova 'waikuye wata i na lulu'ivoneyeni 'ana 'eba nuave'avina.”

S8 Ion 19:40

Iudasa nuanuana Iesu i na 'etogiluveni.

10 Iesu i iwagi i 'a'avana, mulieta tamu yana tovetutuyama 'ana wagava Iudasa Isakaliota i nago tovelomu 'adi to'edakumetavo 'waidie nuanuana Iesu i na 'etogiluveni 'waidie bega i na luvewafai. 11 Iudasa yana vonanina i nogai i sosoana i vona'awaufaufa 'waineye tutula i na veleni. Bega Iudasa i luala 'eda'eda 'atumaina 'wainega Iesu i na 'aniveleneni.

Iesu ma yana tovetutuyamavo i 'ani.

12 Sakali Uvi'agalatagona 'ana 'aiata 'eba velamu 'waineye, beledi kebu 'ana 'ivebwaika i 'ani'ani, wata 'aisaya sifi natudiavo i nikenikedi i vevelomuyedi sakalinina faifaina. 'Aiatanina 'waineye, tovetutuyamavo Iesu i velutolieni i vo, Ava'aibe bei nuanuamu yada sakali 'ani'aninina 'a na 'idewadewa?” 13 Bega Iesu yana tovetutuyamavo 'adi 'ailuga i vonedi i vo, 'Wa na nagoi Ielusalema nageneye, tamu tomogo ma yana 'eba koi ufa i veadagi 'wa na veluagai i na nunago tamu vanuga 'waineye 'wa na yogo'waili. 14 Vanuganina 'waineye i na lukuga tonivanuga 'wa na velutolieni side bani'odi 'wa na voneyedi, Yama Tove i vo, Ava'aibe yaku tutudaba bei yaku tovetutuyamavo taiadi 'a na 'ani Uvi'agalatagona faifaina?” 15 Bei tonivanuga i na vemi tamu tutudaba bwaikina tabwaneye 'akonadi i 'idewai faifaida. Bei 'ada'ada 'wa na 'idewadewa.” 16 Tovetutuyamavo 'adi 'ailuga i nagoi 'atamana bwaikineye naninidi Iesu i voneyediga matatabuna i veluagadi nika bei sakali i 'idewadewa.

17 Inala i simwanuya Iesu ma yana tovetutuyamavo 12 taiadi i maia, i luku vanuge i na 'ani. Yadi 'aninina 'waineye Iesu i vo, A na vonemi, tamu 'waimiega i na 'etogiluveku, taunina ma fueda ta 'ani'ani.” 19 Tovetutuyamavo yana vona i nogai nuafoudi i veviga 'aitamogana 'aitamogana i vevelutoli i vo, 'Auvea, voke yau, siwe a nuani kebu.” 20 Iesu i vo, 'Ami 12 nagemiega 'aitamogana i na 'etogiluveku. Taunina 'ama 'ailugana 'ama beledi 'a lulu'utuva 'aivoeye siwe kumanina. 21 Basenadiotoga i kilumi Yaubada yana Buki 'waineye yau a vetomotogaotoga i na nikeku a na wafa, i vonaga mogitana, we'e yau a vetomotogaotoga 'aku to'etogiluva nuakalikalina. 'Ako kebu i da tubugaga 'atumaina, siwe fai i tubuga yana sakonanina faifaina veviga bwaikina i na veluagai.”

S12 Sou 12:14-20S18 Same 41:9

Iesu yana 'ani.

22 Tutuyanina i 'ani'ani Iesu 'ani'ani i 'ewai i vekaiwa Yaubada 'waineye mulieta i 'ivivia i 'a'avana yana tovetutuyamavo i veledi. I vonedi i vo, 'Ani'ani de'e 'asa'aiana tomogoku. 'Wa na 'ewai 'wa na 'ania.”

23 Mulieta oine ma vedina i 'ewai, Yaubada 'waineye i vekaiwa, i veledi matatabudi i yemu. 24 Bega Iesu i vona i vo, Oine de'e 'asa'aiana dayagiku, i na ilolo fuemi faifaimi. Yaku wafanina 'wainega Yaubada yana Veakutagona 'Ivauna basenadi faifaina i vona'awaufaufa i na velamu 'waimie. 25 A vona mogitana 'waimie, oine de'e kebu wata a na yemuga, i na nagoga mulieta oine 'ivauna a na yemu Yaubada yana 'Eba Veimea nageneye.” 26 Iesu i vona'a'ava lei subisubia tamu i silakai i lei mulieta i nago i laka 'Oya Olive.

S24 Sou 24:8 1 Kol 10:16 Ion 6:54-56

Iesu i vona-vagata Fita i na ve'eweniga faifaina.

27 Iesu i vona yana tovetutuyamavo 'waidie i vo, 'Ako matatabumi 'wa na degaloveku fai basenadiotoga Yaubada yana Buki 'waineye i kilumi faifaimi i vo,

Yaubada to'isave'avina i na nikei i na wafa, we'e 'aisaya sifi i na ve'aladegadega.”

28 Vonanina i kilumiga i na nikeku faifaina mogitana, siwe tutuyanina Yaubada i na sivetovoiku a na kumeta a na nago Galili bei ta na veluaga.” 29 Fita i vona-matayo'o i vo, 'Ai'edi tomotoga matatabudi i na degalovemu, we'e yau kebu a na degalovemuga.” 30 Iesu Fita i voneni i vo, A vona mogitana 'waimuye 'ako lovane tutuya 'aitonu 'u na bavusebeku mulieta kamukamu 'ana veluga i na kwage.” 31 Nika Fita i ve'awafatafata i vo, 'Ai'edi taiadi ta na wafaga i lubwaineku, siwe kebu a na vo, Yau Iesu kebu a da 'asetaiga.” Ava'ai Fita i voneyeniga, enavo matatabudi wata bani'odi i vona.

S27 Ion 16:32 Sek 13:7S28 Mak 16:7S30 Mak 14:66-72

Iesu i nago Gedesemani bei i velu'ui.

32 Mulieta Iesu ma yana tovetutuyamavo i nagoi tamu wala'ai 'atumaina 'waineye 'ana wagava Gedesemani, bei yana tovetutuyamavo i vonedi i vo, Side bei 'wa na miabui 'wa na miamiani, yau sino bei a na nago a na velu'ui.” 33 Tomotoga 'adi 'aitonu i vonedi taiadi i nagoi, Fita, Iemesa wata Ioni. Venuafouviga wata nuavita bwaikina Iesu i vebaeni i vonedi i vo, Yaku nuavita bwaikaotogina 'wa da vo nuafouku i da 'e'etokadia wata 'wainega sai'afoga a na wafa. Side bei 'wa na miamia kebu 'wa na 'enoga 'wa na 'isa'isa.”

35 I vaganago i lumata'afufu i velu'ui Tamana 'waineye 'ai'edi i na lubwaineniga 'ana vitanina i da 'ewai 'wainega. 36 I vo, Ie Tamaku, nani matatabuna 'waimuye safailidi, veviganina wata wafa 'u da 'ewadi 'waikuyega. Siwe 'asa'aiana, de'e kebu yau yaku nuanuaga, 'omu yamu nuanua bega a na vematayakeyakenimo.”

37 I velu'ui i 'a'avana i vilai i nago yana tovetutuyamavo i 'isedi i 'eno'enovi. I luvagonidi Fita i voneni i vo, Saimoni, awale 'u 'eno'eno, 'u da 'isa'isa 'awasasa 'aitamogana. 38 'Wa na 'isa'isa wata 'wa na vevelu'ui nika kebu vetalaimimila 'waineye 'wa na be'uga. Nuanuami 'wa na 'ivaiseku siwe yami toketokena i mwea.”

39 Wata 'ana veluga Iesu i vaganago yana velu'uinina i luvaitugani. 40 Wata i vilai i mai yana tovetutuyamavo i 'isedi i 'eno'enovi fai matadi i duduna-'afo'afo. I luvagona-vaituganidi siwe kebu tamu ava'ai i da voneyeniga fai i bunumayaga. 41 Wata i 'iawedi i vilai i nago i velu'ui, mulieta yana vila 'ana vetonu 'waineye i mai yana tovetutuyamavo i luvagonidi i vonedi i vo, 'Omi 'alo 'wa 'eno'enovi. 'Asa'aiana, siwe 'wa 'isanaweni, 'aku to'etogiluva i le'wa. Yau a vetomotogaotoga yaku tutuya 'akonadi i le'wa bega i na 'aniveleneku tosakona yadi toketokena 'waineye. 'Wa tovoi ta na nagoi 'waidie.”

S34 Ion 12:27S34-35 Ibu 5:7-8S36 Ion 6:38

Iesu 'ana 'ive'avina.

43 Bola Iesu i veveifufu nika Iudasa i mai, kumanina tamu Iesu yana tovetutuyamavo 12 'waidiega. 'Aila'a bwaikina taiadi i maia, ma yadi kefata wata fulumai, tovelomu 'adi to'edakumetavo, ve'etoboda 'adi tovevo wata me Diu yadi to'edakumetavo 'au'auveadi 'waidiega i vetunedi i maia.

44 To'etogiluvanina 'akonadi 'aila'a i vona-vagasedi yana tugusa i vo, Tomogonina a na 'avalamaigiga, kumanina nuanuami, 'wa na 'ive'avini 'wa na naweni.” 45 Tutuyanina i le'wai Iudasa tonovina i nago Iesu 'waineye, i vo, Tove, kaiwa,” nika i 'avalamaigi, bega 'aila'a Iesu i tovififineni i 'ive'avini. 47 Iesu yana 'aila'a 'wainega tamu tomogo yana kefata i yo'ei tovelomu bwaikina yana tofolova igodi i da nikei, taniga'avana i tutuomuya. 48 Tomotoganidi i maia Iesu 'ana 'ive'avina faifaina i vonedi i vo, Yau 'wa da vo to'ainike bega 'wa maia ma yami kefata wata fulumai 'aku 'ive'avina faifaina. 49 'Aiata 'aitamogana 'aitamogana a mimiabui vanuga 'eba velu'ui nageneye a veve siwe kebu bei 'wa da 'ive'avinikuga. Siwe de'e naninidi 'wa 'i'idewadiga 'waikuye nika ava'ai basenadiotoga Yaubada yana tolu'ivonavo i kilumi faifaiku yana Buki 'waineye, 'ana mogitana i souyeni.” 50 Iesu i vona'a'avana yana tovetutuyamavo matatabudi i degalovei.

51 Tamu tubuau ma 'ana kaleko sulu Iesu i yogo'waili, Iudasa yana 'aila'avo i 'iseni nuanuadi i na 'ive'avini nika i yaibamui 'ana kaleko'ava i 'ewai, we'e konekonena i dega.

S48 Ion 18:20S50 Mad 26:31 Ion 16:32

Iesu i tovoi Diu Kaniselo matadie.

53 Mulieta Iesu i mieni tovelomu bwaikina yana vanuge. Vanuganina 'waineye Diu yadi to'edakumetavo 'au'auveadi, tovelomu 'adi to'edakumetavo, wata ve'etoboda 'adi tovevo i va'auta Iesu yana vonayavuga i na nogai. 54 Fita i yogo'waila siwe 'ani'ieogose kebu lilivadie, i nago i luku vanuganina 'ana kali nageneye, tanotanoge i miabui tolugaviavo taiadi, 'ai-'ala'alata 'waineye i vevevala.

55 Vanuganina nageneye tovelomu 'adi to'edakumetavo wata 'ifwaidi Diu yadi Kaniselo Iesu yana vonayavuga i noganogai nuanuadi vekaliega i na luvewafai, siwe kebu tamu yana sakona i da veluagaiga. 56 Bega tomotoga fuedi i lu'ivona-vekavekali siwe yadi vonanidi kebu i da vesala.

57 Mulieta 'ifwaidi i tovoi i vekali i vo, Tamu tutuya 'a nogai Iesu i vo, Vanuga 'eba velu'ui tomotoga i yogoniga a na geuya, wata 'aiata 'aitonu nagedie tamu a na yogoni, siwe kebu tomotoga 'adi 'a'aiyogona.” 59 Siwe wata tomotoganidi yadi vonanidi tulina tulina, kebu i da vesala.

60 Tovelomu bwaikina i tovoi matadie Iesu i voneni i vo, I vevitamuga, bonadi 'u tutuli, i vona mogitana 'alo kebu?” 61 Siwe Iesu kebu tamu ava'ai i da voneyeniga i veve'wada. Wata tovelomu bwaikina i velutoli-vaitugana Iesu 'waineye i vo, Mogitana 'omu Keliso, Yaubada 'ana Venua'ivina wata Natuna 'alo kebu?” 62 Tovelomu bwaikina yana velutoli Iesu i tutuli i vo, E'e. 'Awaie yau a vetomotogaotoga 'wa na 'iseku ma yaku veimea Yaubada Bwaikaotogina 'ana 'atagie a na miabui, wata abamega a na obuobuma waowa 'wainega.”

63 Iesu yana vona faifaina tovelomunina ma yana kamogala 'ana talauma i silabu'i i vo, 'Wa nogai? I vona-awadamana Yaubada 'waineye, tovevita 'ifwaimi 'asa'aiana, kebu 'wa na vonavonaga. We'e 'omi 'wa da nuani, i na wafa 'alo kebu?” Kaniselo matatabudi yana vona i tutuli i vo, Yana vonanina 'ana nogaya i lubwaineni wafa.” 65 Mulieta 'ifwaidi i kiwakiwali i 'a'avana matana i umadina nimadi i nunumidi i nikei wata i sidibidibieni i vo, 'Omu igodi Yaubada yana tolu'ivona, yama fio, 'u da nuaniga aitoi i nikemu?” I 'a'avana tolugaviavo i vagavaia i nunaweni i nikenikei.

S57-58 Ion 2:19-21S61 Mak 15:5 Ais 53:7S62 Mak 13:26 Dan 7:13S63-64 Ion 19:7 Vei 24:16S65 Ais 53:5

Fita i ve'eweni Iesu.

66 We'e Fita i miamia tanotanoge, tamu vavine tovelomu bwaikina yana tofolova i souyeni, Fita i 'iseni i vevevala i 'i'isadewai i 'a'avana i voneni i vo, 'Omu wata Iesu Nasalediega yana 'aila'a.” 68 Siwe Fita i ve'ewa i vo, Yau kebu. Ava'ai 'u vonevoneyeniga kebu a da 'asetaiga.” Bega Fita i vaganago kali 'awaneye nika i nogai kamukamu i kwage.

69 Wata tofolovanina i 'iseni Fita i tovotovoi, 'ifwaidi tomotoga 'waidie i vo, Sino tomogonina, Iesu yana 'aila'a tamu.” 70 Siwe Fita i nogai i ve'ewa-vaitugana i vo, Yau kebu.” Tutuya siaina i 'a'ava wata 'ifwaidi tomotoga lilivaneye i tovotovoiga i voneni i vo, Mogitana, 'omu tamu Iesu yana 'aila'a fai 'u mai 'awalawa Galili 'wainega.” 71 Nika Fita i ve'awafatafata i vo, 'Ai'edi a da vevekaliga, Yaubada i da nikeku, we'e aigodi, tomogonina kebu a da 'aseta-tonovi.”

72 Fita i vona'a'ava nika kamukamu 'ana veluga i kwage. I nogai, i nuani Iesu yana vona i voneniga i vo, 'Ako lovane tutuya 'aitonu 'u na bavusebeku mulieta kamukamu 'ana veluga i na kwage.” Fita vonanina i nuani i taibwaubwau.

S72 Mak 14:30